খোংলোই বীদাই

খোংলোই বীদাই হাইবসী মীতৈলোন্দা ইবা ৱারী মচা অমনী ।

ৱারী মচা অসীগী মনুংগী অয়াওব

নারক মোংসোংনা কাখৎপা য়ারোই মতাগুম ঙাক্থোক্লী। অদুবু খাং- লাক্পা ঙম্বপোৎ নৎতে꫰ মীওইবী চক্রীদা । খোংলোই ওইনা লাক্মীননরীবা অথৌবা꫰ লাইরবা অমদী পাংদবা চংসীন্বা হৌরক্ই চীংদোনগী পান্দম্দা। তসেংনা চীং কাবদী হৌদ্রী মখোই। চীংখোংগী অইংবা নুংসীৎতা꫰ পুম্নমক তুংওইনরবা মীওই খরা নীংঙাইদনা ফম্লী মমীৎ ওইসীন্দুনা। চাংদম্ননা꫰ কল্লক্পা꫰ অপাম্বা꫰ অঙক্পা꫰ ময়াই কাবা করীসু ফাওদ্রবা মখোইনী। মসানা তসেংনা য়েংলী মখোইগী নুংদা। অসীবা হক্চাং খরসু তারী চীংখোংগী মচী মচীদা। কা হেননা ঙম্বা ওইদ্রী। মখোই অহুম অৱাবা লৈত্রীবনা মখোং য়াংই꫰ হরাও তয়াম্মী। অরাপ্পদা ওরী চীংগারোই সংগু সংগু পরেং পরেং চৎলীবা। নুমীৎনা মঙাল ফুদোক্পা হৌরক্পদা চীংগী অঙম্বা সরুক্কা মাইওক্নৈ। তপ্না তপ্না নীংসীংহল্লী মখোইনা লাক্খীবা খোংচৎ꫰ খোংলোই꫰ নুমীৎনা তাখীদ্রীঙৈ꫰ নোংমগী মতম। ফংদবা য়াদ্রবা ফীরাল পান্দম চীংদোনগী꫰ য়ৌগে লেপ্লীবা পুম্নমক চীংদোন꫰ কনানা লেপ্লুবা ঙম্দ্রীবা꫰ নুমীৎনা লোৎখীদ্রীঙৈ। ঙম্বা হেল্লক্লীবা চীংমাইদা ময়া কাথোক্তুনা নুমীৎনা মৈসা কাম্থরী। চোক্থবা হৌরক্লবা অথৌবা꫰ লাইরবা অমদী পাংদবা চয়া োম পুথোক্তুনা চামীননৈ। ঙৈহাক অৱা পোথাফম্দা পুল্লবা অতোপ্পা চীংগারোইগা চয়োম লাননদুনা চামীননৈ। নোক্মীননৈ। হৌনরুবা লৈতনা অমনা অমগী সক তাক্নদুনা ওনখী চাননরবা মরুপ। কাখৎপা অমুক হৌরে। নুমীৎসু নোংমগী মপুন্সী তংখাই চল্লক্দৌরে। খোংথাং তপ্থনরক্পা মরম্না মী কুংসীন্বা হেল্লক্ই। নীনফুং নীনফুং তারম্বা ৱাহৈসীং ময়েক সেংলক্ই।
-তীংখংনা পীক থনখ্রে কাবা ঙম্লরোই।
- নথৌনা লৈয়ু꫰ তীংখং অসী লান্থোক্লগা খোংলম্বী লৈরীবনী ।
- অসম্বা লম্বীগা লৈত্রব্রা꫱
- অসম্বা লম্বীনা কৈদৌনুংদা তুং কোইরোই꫰ খাংবা কল্লু।
- ঐ সীরসু সীখ্রসনু মফম অসীদা꫰ পাংগল লোইরে।
- নংগী ৱাখল্না নংগী হক্চাংবু পন্থহল্লীবনী।
- হুমাং ফাওবা থোক্খীদ্রে ঐগী হক্চাং꫰ ঐ সীখীবদ
চীংনদ্রে। - মাংদা লাক্কদবা নুংঙাইবসীং নং ওনীংদ্রবরা꫱
- ঐ মদু থাজবা ঙম্দে তুম্থবা পাম্লে꫰ সীববু চাংয়েংনীংলে।
লৈচীল মপৈ অমা খংহৌদনা হুম্জীল্লক্পদা মখোইগী খোনজেল অদু মরুওইরুদ্রে। চোক্থবা খরা ফবগুম নীংলী খোংলোই অহুম্গী হক্চাংসু। মীৎকুপ্তা স্বাই মাংখী লৈচীল। মীওই খরা ওম্সীন্দুনা লৈরীবদু ওরক্ই। মখোই অহুম চংসীল্লুই꫰ তীংখং মরক ওইরবসু। পীক্খ্রবা লোক অমদনী মীয়াম্না ইসীং ঙাইনরীবা꫰ মুননরীবা। তাংনা ফংবা তানজা অমনা মখোই অহুম্বুসু খৌরাংবা খরদী কোক্হল্লী। অথৌবা ফম্প্রেৎ তানা ফম্থখী। - মরুপ ঐগীদী পাংগল꫰ থৌনা লোইরে। মফম অসীদা পল্হৌরগে꫰ নখোই অনী মতোন লোম্না কারুখো। - অথৌবা কারক্লীবসী তংখাই ফাওবা চন্দ্রী꫰ করীগীনো অমুক থুনা থৌনা মাংলীবা꫱ - মরুপ ঐ মখা তানা করীসু পাম্লুদ্রে꫰ পোথানীংলে।
- নখোং নখুৎ তেক্পা নৎতে নং꫰ অমুক্তদী খন্থখো꫰ লাক্খীবগী মরম। - ফনা ওইনীংবা ওইসনু মরুপ꫰ অসুক ৱাবা খোংচৎ ঐ মখা তানা সরুক য়ানীংদ্রে꫰ নখোই চৎচরো থেংলনী।

- অথৌবা!
লাইরবা অমদী পাংদবা পাম্বৈ লৈত্রদুনা থাদোক্লম্লে অথৌববু। মতৌ অদু ওবদা নক্নবা চীংগারোইসীংনা চীবোন চীবোন ঙাংনৈ꫰ অতম্ননা হাইরক্পসু য়াওই। - মীনুংসী খংদবা। লাক্মীনরগা লংথোক্লম্বা। পন্থুং য়ৌবসু ঙম্লোই। লাইনা খল্লুনু চৎকদৌরীবা লম্বীসী। ওইররোইদবা খোংচৎনী হনখীবনা অফবা ওইগনী। মখোই অনীগী ৱাখল হোংহন্বদী ঙম্দে꫰ খোংথাং লেপ্তে। নোক্হৌবা ঙাংনহৌবা মখৈ নাথৈরম্লে। অমুক হনখীবা হাইবদুদী ওইথোক্লরোই꫰ লাক্খীবগী মরম পন্থুং য়ৌরুনবনী। লম্সী-সীহৌবা হক্চাং কয়া মচী মচীদা তাহৌরীবা চীংখোংদগী হৌরগা। মখোই অদু হনখীবগী মমী অমৎতা তাহৌদে꫰ কনা কনা সীখীবগী মতৌ ওৎহৌই। তানজা অদুদা অসীবা হক্চাং অমা কোল্লগা কনাগুম্বা অমনা মচীন্দা সোল্লম্মী꫰ খাংবা ৱাবনরা অদুক ঙাইঙম্দ্রীবা꫱ নথন্তা সীজীরীবা মরুপ꫰ নংগী লম্বী অফবা মমী অমৎতা ওখীদে। - তারব্রা মরুপ অসীবী ৱাহৈ অসী।
- পাংদবা꫰ তু চুংনীংঙাইগী মসক্নী।
- মরুপ নহাক থাজবা লৈরীব্রা꫰ অথৌবনা হীংদুনা লৈরক্খীনী হাইবগী꫱ - মদু লাক্সীল্লুবা ঙম্দ্রে মরুপ꫰ নং ঐ ফাওবা চৎমীননরী কাওরক্লবনী। - ফনা ওইরবসু মরুপ অপাম্বা লম্বীদী খক থীগুম্সী।
- মাননী মরুপ মদু কা হেননা খুদোংথীনীংঙাইনী।
- ইহীং নাইহীং সারবা অসীবা মহাক অদু অসম্বা লম্বীদা খোং থাংলুবগীনী। তীংখং তুম্বৌ মায়োক্নবা ঙম্খীদে মহাক। - মহাক্কা লোইনরক্পা মপাংসীংনা লোইসীন্বা নাদনা তেংথারী।
- মহাক্না সেম্জবা লম্বীনী মরুপ।
নুমীৎনা কোক্তোন্দা লৈখ্রে। লাইরবা অমদী পাংদবা কাখৎপা লেপ্ত্রে। ফীরাল ফংনবগী ৱাখল্দা চোক্থরবা হক্চাং তুইননরী। মখুৎতা খুৎলাই নীংথীনা পাইরবা মীয়াম লান্দারী নাইতোম তারবা সা অমদা। - চেনখ্রীবা সা অসী তাননৌ꫰ অকীবনা লৌসীং মাংলবনী।
- ঙাইখো মদুবু হৌনব্রা꫱
- সা অসী চীনজাক্নী꫰ অঙম্বনা চাক্থোক্নবা নৎত্রবদী ঐখোইবু সীখ্রো হাইব্রা꫱ - করী! লম্বা চাদে নখোইগী লান অদু।
- মতম মাংহনগনু ৱারেম্নী কাননদবা꫰ মহাক্কীসী তারুবগী কাননবা লৈতে। মীসৌ চংলবা মখোই ময়াম হুপ্চীন্দুনা সা অদুবু হাৎতোক্ই। পাম্জবা সরুক খননদুনা য়েন্থোক্নৈ। ই- নাই খরা লৈমাইদা পক্হৌবা অদুনা হয়ীং খোংয়াম্বী꫰ তুমীৎ কাংসীংনা লেক্তুনা লৈহৌই। লৈতোং লৈখুৎ কা হেল্লক্পা চীংগী ঙম্খ্রবা সরুক অমা থেংনরে মখোই অনী। মফম অদু অসোক্পা অপন কুংই। মীওই কয়া সীবা মচেৎ খাক্তুনা লৈরম্বা থেংনৈ। - হুরান꫰ পীরক্ও কদাই।
- মসী ঐগীনী নংগী সরুক নৎতে।
- করী! ঐগী চয়োম হুরাল্লগা চাবা ঙম্বা নংবু ঐগী মরুপ্লা।
- ঐবু হুরান্বা!
- চয়োম অদুগীদমক মখোই অনী চোংসীননদুনা নম্নৈ। অমনা অমবু হাৎনগদবগী মতৌনী। সীংকুপ সারে চয়োম্সু। মতৌ অদু য়া েংলীঙৈ খোংফম চারুদ্রে লাইরবা। পাংদবনা হক্চাং ঙাক্ই। মখোং থাংবা ঙম্খীদ্রে লাইরবা।

- করী মতৌনো মরুপ।
- পাংদবা চীংনগনু꫰ ঐবু মফম চাবা অমদা ফম্থদুনা পোথাহল্লু꫰ অদুগা নহাক নথন্তা কাখ্রো꫰ চীংদোন য়ৌদবা য়াদে খল্লু মরুপ। - তসেংনা খোং ফুক্পা ঙম্দ্রবরা মরুপ꫱
- ঐনা মীৎ চোইরীঙৈ অৱাবসী নংলীবনী। চৎনীং চৎনীংবা য়ৌরুবা ঙম্লরোই। সে চয়োম অসী পুখো মরুপ। ঐ পোথাহৌরগে ফন্থরগনু। - মরুপ!
লাইরববু পোথাফম পীরম্লগা নাইতোম মখোং থাংবা হৌরক্ই পাংদবা। নীংসীংলুই অথৌবা꫰ মহাক্পু ঙাইরম্খীগদ্রা খল্লী। লাইরবা꫰ খুদোংথীবা꫰ ফাওরম্গদবা চৈনা নুংপাল অনীদা। অঙম্বা চীং অমদী থাপ্তোক্খ্রবা খোংলোই꫰ হেননা চমম্নহল্লী পাংদববু। নুমীৎকী মৈসা চম্থবা হৌরক্লে। অতোপ্পা মীওইসু থোই ওখীদ্রে꫰ মরক্তা অমা অনী লননা থেংনবা নৎতনা। পাংদবা ওরুম লাংবা মফম অমদা ঙৈহাক ফম্থৈ। চয়োম পুথোক্তুনা অরাম খৌরাংবা খরা কোক্হল্লী। পোথাবা হাইবসীনা পন্থুং য়ৌসীন্বদা থীন্থহল্লী꫰ খল্লী মহাক। হক্চাং অদুতনী পোথারীবা মতম্দী লেপ্তুনা লৈথোক্তে। খংনা চৎখী꫰ য়েংদুনা লৈহৌই। পোথাদবী ঙম্দে। তুম্থনীংবসু মাইওক্নবা ৱারক্ই। পাংদবা মমীৎ সীংলক্ই। ঙৈহাক ওইথরুরে। নুমীৎসু লৈথরম্লে। মসাগা লোইনরক্পা পোৎলম্সীং খন্থরুবা তৌদনা মখোং থাংবা হৌরক্ই য়াংনা। ওবা কৌবদী লৈত্রী পান্দম চীংদোনগী ফীরাল। নারোন্দা ফাওরক্কদৌরীব্রা꫰ খল্লী মথন্তা। পানা খীক্লক্পা নোংলীক্না নুমীৎ খনজীনখ্রে। পাংদববু চীংনহল্লী। মখোং থাংবদী লেপ্তে। নোংলীক মাংখীবদা꫰ খল্লুদনা থাজরে꫰ উরীবা অদু ফীরাল পরেং অমনী। মহাক্না পাম্জনা ফংগনী লাক্খীবা অদুসু মাইওক্নরে। মদু ওবদা খন্থরুদনা নোক্ই। পান্দম চীংদোন ফংলে অদুবু চীং কাবগী অৱা নুংঙাই অদুদী লোইখ্রে। পোৎথাফম নৎতনা করীসু লৈতে꫰ লম্বীসু ওখীদ্রে। পুম্নমক চীংদোন হাইবদু মমীং তাখ্রবসু মসক্তী ওদ্রী। মহাক্কুম্না খৌরাংলবা কয়াদী লেপ্লী। নুমীৎসু চীংনা খনখ্রে꫰ নোংমগী মপুন্সী লোইরদুনা ।

লৌরক্ফম্

• (ওক্তোবরা ২১, ২০১৮) হীংবা তম্লী.

• হুয়েন লানপাও, সেপ্তেম্বরা ২১, ২০১৮ ।