চীন তেরাকোতা লানমীসীং

তেরাকোৎ লানমী নৎত্রগনা তেরাকোৎতা ৱারীয়রস হাইবসী চাইনাগী অহান্বা নীংথৌরেল চীন সী হুৱাংগী লানমীসীংগা মানননা লৈখোম্না সাখীবা লানমীসীংনী। মতম্দুগী থাজনবী অমগী মতুংইননা অসী লৈবাক্তা নীংথৌগী থৌগল তৌরুনবগীদমক অসাবা লানমীসীং অদু চী সী হুৱাংগা পুননা লৈরোল চনখীবনী । খ্রীসতগী মমাং অহুম্সুবা চহীচাদা সাখীবা লানমীসীং অদু চাইনাগী সনজী প্রোভীন্সা মনুং চন্বা লীন্তোং দীসত্রীক্তা লৌমীসীংনা কুম্জা ১৯৭৪ দা থেংনরক্খীবনী। অসাবা লানমীসীং অদু মতৌদাং খেননবগী মতুংইননা অৱাং অনেম্সু মাননরম্দে । খ্বাইদগী ৱাংবা অদুনা জেনরেল্নী হাইরী । খোংমী লানমী ꫰ সগোল গারী অমদী সগোল কয়াগী মীতম্সু য়াওরম্মী । কুম্জা ২০০৭ কী রীপোরৎ অমগী মতুং ইননা তোঙান তোঙান্বা কোম অহুম্দগী অসাবা লানমী ৮০০০ সগোল গারী ১৩০ সগোল ৫২০ অমসুং সগোল তোংবা লানমী ১৫০ লৈরম্বা থেংনখী হাইরী। অসাবা লানমী অয়াম্বা নীংথৌরেল চীন সী হুৱাংগী মোংফম মথক্তা থেংনখীবনী। অতোপ্পা কোম খরদগী লানমী নৎতবা অঙম অতৌ꫰ সাননরোই অমদী ম্যুজীসীয়ান কয়াগী মীতম্সীংসু থেংনখী । কুম্জা ১৯৭৪ গী মারচা ২৯ দা লৌমীসীংনা মাওনৎ লীসান্দা লৈবা নীংথৌরেল চীন সী হুৱাংগী মোংফম মথক্তা গুহা তৌবদা তেরাকোতা আরমী থেংনখীবনী। চহীচা কয়াগী মমাংদগী মফম্দুদা তেরাকোতা ৱারীয়রগী মচেৎ মকাই থেংনবগী থৌদোক কয়া থোক্খী। অদুবু হন্দক্কী অসীনা খ্বাইদগী মসীং য়াম্না চোম্লপ থেংনবনী । মতুং তারক্পদা চাইনীজা আরকীওলোজীসৎসীংনা থীজীন্বদা লৈবাক্না সাবা মীতম কয়ামরুম মফম্দুদগী ফংখী । নীংথৌরেল চীন সী হুৱাংগী মোংফম অদু মাওনৎ লীগী চীংখোংদা লৈবাক্না পীরামীদকী মওংদা সেম্বনী ।লৈপল্না পুম্কোই কোইসীন্বা মোংফম অমদুদা ওফীসা꫰ হোল꫰ সগোল্সং অমদী অতৈ স্ত্রক্চরা কয়ামরুম লৈরম্মী । মোংফম অমদী অকোইবগী ফীভম অদু সেম্গৎখ্রবা মতুং চহীচা অনীরোম লৈরগা তৌথোক্তুনা য়েংলুবদা মীতরা ৫ (ফুৎ ১৬) লোম ৱাংনা লৈসৌ কারম্বা থেংনখী ।আরকীওলোজীসৎসীংনা মাওৎ লী-গী চীংখোংদা লৈবাক তৌথোক্তুনা থীবদা অতোপ্পা মোংফম কয়াসু থেংনখী । হীসতোরীয়ান সীমা কীয়ননা ইদুনা থম্লম্বা রেকোরদা মতুংইননা খ্রীসতগী মমাং কুম্জা ২৪৬ তা চীন সী হুৱাংনা মসাগী চহী ১৩ সুরক্পদা নীংথৌ ফম্বাল হেক লাংবগা মোসোলীয়ম অদু সেম্গৎপা হৌখ্রবনী হাইরী। মদুদা থবক সুবা মীওই লাখা তরেৎলোম সীজীননরম্মী । তেরাকোতা আরমীগী মীতম্সীং অদু লৈঙাকী মখাদা লৈবা সীনমীসীং অমসুং মখুৎ মসা হৈবসীংনা অফংবা পোৎলম খরা সীজীননরগা সীন্সংসীংদা সাখীবনী। মকোক꫰ মখোং꫰ মখুৎ অমদী হক্চাংগী সরুক্সীং তোখাই তোখাইনা সারগা কোননা পুল্লপ পান্সীনখী। সাবা লোইরবা মতুংদা লৈখোম তৈসীন্দুনা মওং মরীল তানবা সেম্খীবনী হাইনা থাজনরী। সাবা লোইরবা মতুংদা লানমীগী মীতম্সীং অদু ফম্থোল্গী মতুংইননা মথং মনাও নাইনা লানগী মওংদা কোম্জাউ মনুংদা থম্বনী। অসেংবা মীগা চাওবা মাননা সেম্বা লনমীগী মীতম্সীং অদু অমগা অমগা মসক মাননদে। মরেপ্তা꫰ ফীজেৎতা অমদী সম্হাৎতসু অমৎতা মাননদে। অসেংবা থাং꫰ তা অমদী তেননচীংবা খুৎলাইসীং পাইবা মীতম্সীং অদু তোঙান তোঙান্বা মচু মমেন কয়া তৈসীন্দুনা হেক ওবদা অসেংবা মী মাননবা সেম্বনী । মফম্দুদগী ফংবা পোৎলম ১২০ অমদী তেরাকোতা ৱারীয়রা ২০ লন্দনগী ব্রীতীসা ম্যুজীয়ম্দা থম্খী। ‘দা ফারসৎ এম্পয়রা: চাইনা’জা তেরাকোতা আরমী’ হাইনা মীংথোন্বা অখননবা এক্সীবীসন অমা কুম্জা ২০০৭ কী সেপ্তেম্বা ১৩ দগী কুম্জা ২০০৮ গী এপ্রীল ফাওবা পাংথোক্তুনা পোৎলম্সীং অদু ওৎখীবনী। বারসেলোনা꫰ মেদ্রীদা꫰ সেন্তীয়াগো꫰ সেন ফ্রান্সীসকো꫰ কালীফোরনীয়া꫰ এতলান্তা꫰ ৱাসীংতন দী সী꫰ তোরোন্তো ꫰ স্বীদেন꫰ ন্যু সাওথা ৱেল্সা꫰ মোন্ত্রীয়ল꫰ ন্যু দীল্লী꫰ মুম্বাই꫰ সলারজং অমদী কোল্কতানচীংবা মফম্সীংদসু এক্সীবীসন পাংথোক্তুনা পোৎলম্সীং অদু ওৎখী । কুম্জা ২০০৭ তা স্তেনফোরদা য়ুনীভরসীতী অমদী কেলীফোরনীয়াদা লৈবা এদভান্সা লাইৎ সোরসা ফেসীলীতীগী সাইন্তীসৎসীংনা থীজীন্বদা অৱাংবা থাক্কী সাইন্তীফীক মেথদা সীজীননদুনা তেরাকোতা ৱারীয়রসা সাখীবনী হাইবা খংবা ঙম্মী ।