ইচা ঙাওরে

ইতৈমা ইবেথোইগী মচানুপী ঙাক্তা অনীনী। লৈসাবী মচা কাবক কাবক ফারবনী। অমনা কোলেজা কারী꫰ অমনা তুয়েল্ফা থাদৌ তৌরী। ইতৈমা ইবেথোই ওফীসা অমদা থবক তৌই꫰ মতম্সীগী মীনী꫰ হাই-ফাই মৌনী। ওফীসকা কাবসীদী মচুম তাখৈ কেথরগা কাবীনী। ইতৈমগা লেংথৈনবসীদী꫰ করী মনম্নো খংদে হুং হুং লাওবীনী নুংসীখ্রবা꫰ মমল্দী খরা তাংলম্গনী মানা চাইরীবা মনম চেন্বা থাওদু। মী পুম্নমক্না লেংথৈনবদা꫰ তুং হল্লা হল্লগা য়েংনবীনী। মদু খংবদা ইতৈমনা হরাওজরদনা নোক্ফেৎ তৌজরীবনী꫰ মচা লৈসাবী ফারফাও। তামোদুসু অয়াবীনী। থীকাদারনী꫰ সেল নম্থীখৈ পাইসীল্লগা꫰ অৱারাদা লৈথোক্পনী। চানীংবা চা꫰ থক্নীংবা থাক꫰ ইহা! নুংঙাইখ্রবা পুন্সী হাইদুনী। তুয়েল্ফা থাদৌবীবীদুদী ত্যুসন চৎলী। মম্লীঙৈদগী গারী মচা অমা থৌদোক্লগা মথন্তা চৎলী। মমা মপানা হননা য়া েংসীন্দে꫰ মচা ত্যুসন চৎলীনী হাইদুদনী খংইবা꫰ করী তৌরবা নোংমতা থীরুদে। মচানা লৈয়ু হাই হাইদনা ফোনগসী অতাংবা আই ফোন অমগা পাইবীনী। হল্লক্পগা স্কুল চৎপনেনা চীলী। নোংমতা সোইদে꫰ স্কুল চৎতবা꫰ ত্যুসন চৎতবা য়াওদে। মমানদী মচানা থৱাই য়াওজবদু ওবদা পেনজৈ। মচেসু অদুমঙাই꫰ কোলেজা চাং নাইনা চৎলী꫰ ক্লাসা য়াওব্রা য়াওদব্রা হাইবদী খংদে। মপানা নুমীৎ তাবগা পারতী꫰ ঙৌবী꫰ তাওবী꫰ থক্পী। মমানা ময়াম্দুগা য়া-য়া꫰ গা-গা। মচাসীংনা সোম্দা মাই মাই কাদা লাইরীক পারীবা ফোন পারীরা খংদে꫰ নোক্ফেৎ নোক্ফেৎ তৌদুনা অমুক ওপ꫰ অমুক চেপ꫰ অমুক লোং তৌদুনা লৈরী। মমা মপা চংলক্পদনা লাইরক অমা ফাক্তোক্লগা য়েংই। মোই মতৌদু ওবদা মমা মপাগী আসাসী নোংমা নোংমগী চাওখৎলক্ই। মচাসীংগী অপেন্বা নুংঙাইজবদু ওবদা পেনজৈ। == হন্দক খংহৌদনা মোবাইল দেতা নুমীৎ মঙানী থীংবদুদা মচাখৈ তৌফম খংদদনা মচী মচীদা চপ চপ লেপ্তুনা মমাই মমীৎ ইমক মক্না লৈবদু উবদা মমানা পাখৎলী। মচা নুপী অহল্দু মথোল অহুম্সুবগী বেল্কোনী মাংগোল্দা লৈরীবা রেলীংদুদা ঙারগা নুংসুক নুংজাননা লৈরীবদুগী মনাক্তা চংসীল্লগা হংলুই꫰ “ইবেম্মা কৈদৌরে꫰ নসা ঙম্দবরা꫱ লাইরীক্কা অমৎতা পাদ্রদী꫰ ইমাদা হাইয়ু꫱” খুম্মম্দনা মচানুপী অহল্দু মাগী কাদা চংখ্রগা ফমুংদা বোম লাওনা হীপ্চীনখী।

“কৈনোনে꫰ কৈদৌরবনোনে তৌরীসীবো꫰ সীবু লাইগাইদু ওক্নরজাৎলনে”
খল্লী মচাগী মতৌদু ওবদা꫰ হংই খুম্দে꫰ চাক চারে꫰ পেৎ পেৎ খরা মেৎলম্মগা অদুম মখুৎ হাম্জীল্লগা থোক্খী। মচানুপী অতোন্বীদুসু অদু মঙাই꫰ মাগী কাগী চৌক্রীদুদা তুমীন ফম্মগা ওংদুনা লৈরম্মী। চংসীন্দুনবু হংলুই꫰
“ইচাথোই꫰ কৈদৌরে꫰ নচেসু মসা ঙম্দব্রা কৈনো꫰ হীপ্চীন্দনা লৈহৌই। নংনা কৈদৌরে꫱”
“ইমা! ৱা য়াম্না ঙাংনুকো꫰ চৎলো আদা ঐ খোইদৌ য়াম সাওগৎলী”
সুক্তোক্তুনা অদুম ফম্মী। মমানদী খল্লী꫰ মসীবু ওজানা চৈরক্লবরা꫰ নৎত্রগা মমাননবীসীংগা মরৈ তৌনদুনা খৎনবরা꫱ করী মনীং থুংদবা লৈরবনো꫱
“সে ইচাগী নুঙাইতবদো ইমাদা হাইয়ু꫰ কনানা ইচাদা লাক্চৈ꫰ ইমা লৈরীসীদী꫰ কনানো ইচাবু নুংঙাইহন্দ্রীসে꫰ মতীক থোক্পা লাক্নগে꫰ হাইয়ু ইমাদা꫱”
“নুংঙাইখীদ্রেদা ইমা! খোইদৌনা খোইদৌ সাওগৎপসীদা পেৎ-পা꫰ পেৎ-পা”
ফুক হৌগৎলগা ফমুংদা মচেগুম হীপ্চীনখী। ইবেথোই কৈনো তৌরীসীবো হাইনা তৌফম খংদে। মপাগী মনাক্তা চেনচৎ চৎতুনা লাক্ই।
“নচানুপীসীংসে꫰ লাই ওক্নরব্রা কৈনোমা ইতৌ তৌই। মাইবা তান্বনা ফরীব্রা꫰ নৎত্রগা সাইক্যাত্রীক দোক্তরা অমদা য়া েংহন্বনা ফগদ্রা অমুক্তা খননসী”।
মপাদু হীদাক হাইরপ ঙাওরগা তী ভীদা ফেসন সো অমা য়েংদুনা লৈরম্মী।
“কৈদৌরে হাইবা꫱”
“মোইসী ৱাখল ইরৈ লৈতাদবা꫰ ইঙাও ঙাওবদৌনা তৌই꫰ কৈনো ঐসু হাইফম খংদে”
কয়াম কুইরে꫱
“ঙসী মরীনী সুরে꫰ চাক্সু নীংথী নুংঙাইনা চাদে। অয়ুক্তা খীল্লম্বা চাক অমৎতা চারম্দে꫰ মচী মচী খুদীংদা ওং উংদুনা লৈ”
মপানা তী ভী য়েংনা য়েংনা ৱাখল খল্লগা থৌ-ৱা ইসা সাদনা লৈ। মদু ওবদা ইবেথোইদী মৈ হৌখৈ সাওরে।
“কৈনো নচাখৈনা ঙাউদুনা লৈরগা মপানা সোম্দা য়ু ওইনা ঙাওরগা থৌৱা সাদ্রীসীবো꫱ ঙাও ফৈদনা সোরোক থোক্খ্রদী কমাই তৌদুইনো꫰ হৌগৎলো মাইবা অমৎতা হাননা কৌবীরুচো꫱”
“কৈসু তৌরোই হাইবনী꫰ হয়েং নৎত্রগা হংচীৎ সোদনা ফনী꫰ মোই লাইনাদু ঐ খংই꫰ তুমীন লৈয়ু꫰ মীসা ৱারল খন্বগী প্রোগ্রাম্সী ঐ অমুক্তা ফজনা য়েংগে। ইবেথোই꫰ নোই নচাখৈনা তৌরীদো ঙাউরীনী কো꫰ ঙাওরীনী꫱”
“কৈনো মোই মপাবু দোক্তররো꫱ নচাখৈনা ঙাওনা-ফৈনা লৈরগা꫰ কৈমতা থৌৱা সাদ্রীসীবু কৈগীনো꫱”
“হে! মোইনা ঙাওরীদু লাই ওক্নবগী নৎতে꫰ হোই সাইক্য াত্রীক্বুদী মরী খরা লৈনৈ꫰ গভরনমেনৎনা মোবাইল দেতা থীংজীনখীবদো অদুদা ঙাওরীনী꫰ খংঙবরা। হয়েংলা হংচীৎলা হাংনী হাইবনা꫰ অদুদা মাইনা ফজনী꫰ চৎলো আদা꫰ ঐ তী ভী ঙাইহাক্তা য়েংগে꫰ কৈসু তৌরোইকো”
“হৈমা꫰ অদুগীরানে꫰ অসেংবরনে হাইরীসীবো꫱ অদুদী সীগী কম্পেন্সেসন্সীদী গভরনমেনৎতা তানগদবনী꫰ করীগুম্বা দেতা হাংলকান্দা ইচাখৈনা ফরখ্রদী ফৈ꫰ ফৎত্রদী꫰ ইচা ঙাউহন্বগী কম্পেন্সেসন তানগদবনী꫰ খংগনীদনা হে! গভরনমেনৎ’। মপানা পৈরপ্না মাগী নুপীনা হাইরী ৱাদু নোক্ফেৎ তৌনা য়েংলক্ই꫰ “হে মী তানী ইকাইকো꫰ ইকাই হাইসীনী”।

লৌরক্ফম্

• নরেন্দ্রা নীঙোম্ব (ৱারী কক্নাও)
• হুয়েন লানপাও, ২১ সেপ্তেম্বরা ২০১৮